Grái og hvíti posin

REGLUR UM INNSAVNING FRÁ HÚSARHALDUM

Á aðalfundi tann 3. mai 2007 samtykti IRF ”Reglur um innsavning av ruski frá húskjum í limakommununum”. Reglurnar lýsa nágreiniliga, hvussu arbeiðsviðurskiftini hjá ruskinnsavnarunum eru skipaði.

                                                                                                                             
Stativið á røttum stað

Posastativið skal standa úti á sjónligum staði og sum høvuðsregla á stytstu leið millum atkomuveg og húsini, tó í mesta lagi 20 metrar frá atkomuvegi. Bert ein støð við stativum skal vera á hvørjari ogn.

Støðin skal vera soleiðis, at tað er møguligt at koma heilt fram at stativinum við t.d. sekkjavogni. Stativið skal standa á sløttum, soleiðis at posin kann takast uttan trupulleikar, og soleiðis at posin kann flytast uttan vanda fyri vanlukku ella heilsuskaða.


Ruskið

Rusk má ikki koyrast leyst í ruskposan, men skal vera innballað ella í posa. Blæur, bind o.tíl. skal altíð vera í afturlatnum plastposa, áðrenn tað verður latið í ruskposan.


Posin ov fullur 

Posin er at rokna sum fullur, tá ið 20 cm eru eftir upp til kantin. Serligur dentur verður lagdur á, at posin ikki er skræddur, og at hann ikki vigar meira enn 20 kg.


Leiðin millum ruskstativ og innsavningarbil 

Gonguleiðin millum ruskstativið og ruskbilin skal vera soleiðis háttað, at flutningurin av ruskposanum kann fara fram uttan vanda. Gonguleiðin skal vera sløtt og føst uttan at vera hál. Gonguleiðin skal eisini vera ljós, rein og ruddilig og ruddað fyri kava og ís.

Portur, lúkur o.tíl. skulu kunna standa í opnari støðu og vera nóg breið og høg til, at flutningurin kann fara fram uttan vanda.

Innsavnari­n skal lata portur, lúkur o.tíl. aftur, tá ið farið verður av ognini.

Dettur rusk niður, tá ið posin verður tikin, skal innsavnarin taka hetta upp og beina tað burtur, treytað av, at krøvini omanfyri eru fylgd. 

Posin ikki tikin 
Verður ruskposin ikki tikin, skal innsavnarin boða frá hesum við einum fráboðanarlepa, sum hann leggur í postkassan ella á annað hóskandi stað.