Tak plastið av lýsingum og bløðum, áðrenn tú letur pappírið til endurnýtslu

Ikki ber til at endurnýta pappírið, um plastið fylgir við. Neyðugt er tí at taka plastið av, áðrenn pappírið fer í tann hvíta posan til endurnýtslu, sigur IRF.

– Vit hava ikki arbeiðsorku at taka plasti av, so tíverri fara lýsingar og bløð, sum eru pakkað inn í plast, í brenniovnin. Hetta er sera harmiligt, sigur Aslaug Gisladóttir, varastjóri hjá IRF, tí talan er um rættiliga stórar nøgdir.
Tað er jaligt at síggja, at fólk í alt størri mun ynskja at endurnýta, og vilja vit við hesi kunning hjálpa teimum at gera tað á rættan hátt.
Vit vilja tí heita á fólk um at taka plasti av lýsingum og bløðum, áðrenn pappírið verður latið til endurnýtslu. Pappír og papp kann nevniliga endurnýtast heilar 7 til 10 ferðir.